पूर्व राजा शाह झापा आउँदै

Share

झापा, । राजावादीहरुले यही जेठ १५ गतेदेखि अनिश्चितकालीन आन्दोलन गर्ने तयारी गरिरहेका बेला पूर्व राजा ज्ञानेन्द्र शाह भोलि झापा आउने हुनुभएको छ ।

उहाँ दुई हप्ते बसाइँका लागि दमक ९ स्थित हिमालयन महालक्ष्मी टि इस्टेटको मिनी दरबारमा आउने हुनुभएको हो । भोलि दिउँसो २ बजे चन्द्रगढी विमानस्थलमा अवतरण गरी शाह दमकतर्फ जाने कार्यक्रम रहेको जिल्ला प्रहरी कार्यालयका सूचना अधिकारी डीएसपी खगेन्द्र खड्काले जानकारी दिनुभयो । उहाँ जेठ २५ गतेसम्म झापामा रहने बुझिएको छ ।

पूर्व राजाको सुरक्षाको लागि सशस्त्र प्रहरी बल नेपालको टोली हिजो नै काठमाडौंबाट हिमालय महालक्ष्मी टि इस्टेटको मिनी दरबारमा आइसकेको छ । हिमालय महालक्ष्मी टि इस्टेटको मिनी दरबारमा केही दिनदेखि पूर्व राजाको परिवारका सदस्यहरुको आउन जाने क्रम चलिरहेको इलाका प्रहरी कार्यालय दमकका डीएसपी रामप्रसाद तिमल्सिनाले जानकारी दिनुभयो ।

पूर्व राजा शाहले दमकमा बसेर राजनीतिक भेटघाट गर्दै आउनुभएको छ । राप्रपालगायतका राजावादी शक्तिहरुले जेठ १५ देखि अनिश्चितकालीन आन्दोलनको तयारी गरिरहेका बेला पूर्व राजा झापा आउनुलाई अर्थपूर्ण रुपमा हेरिएको छ ।

ताजा समाचार