लखनपुर स्वास्थ्य चौकीमा उपेक्षित उष्णप्रदेशीय रोग सम्बन्धी स्थलगत प्रशिक्षण सम्पन्न

दमक /कमल गाउँपालिका अध्यक्ष हुकुम सिंह राईको विशेष चासो र स्वास्थ्य क्षेत्रप्रतिको निरन्तर प्रतिबद्धतासँगै आज लखनपुर स्वास्थ्य चौकीमा Neglected Tropical Diseases (NTD) सम्बन्धी Onsite Coaching कार्यक्रम सम्पन्न भएको छ।
कमल गाउँपालिका स्वास्थ्य शाखाको समन्वय तथा फेयरमेड (सहारा) नेपाल को सहयोगमा आयोजित एक दिने कार्यक्रममा लखनपुर स्वास्थ्य चौकीमा कार्यरत स्वास्थ्यकर्मीहरूलाई NTD सम्बन्धी रोगको पहिचान, रोकथाम, उपचार व्यवस्थापन तथा समुदायस्तरमा जनचेतना अभिवृद्धि गर्ने विषयमा प्रशिक्षण प्रदान गरिएको थियो।
कार्यक्रममा स्वास्थ्य चौकीका स्वास्थ्यकर्मी तथा स्वास्थ्य शाखाका कर्मचारीहरूको सहभागिता रहेको थियो। प्रशिक्षणका क्रममा NTD रोग नियन्त्रण, प्रभावकारी सेवा प्रवाह, केस व्यवस्थापन तथा समुदायमा स्वास्थ्य सचेतना विस्तार गर्ने विषयमा सहजीकरण गरिएको निखिता श्रेष्ठ ले जानकारी दिनुभयो।
कार्यक्रममा गाउँपालिका अध्यक्ष राईले गाउँपालिकाभित्र स्वास्थ्य सेवा विस्तार, स्वास्थ्य संस्थाको सुदृढीकरण तथा नागरिकलाई सहज र गुणस्तरीय स्वास्थ्य सेवा उपलब्ध गराउने कार्यलाई प्राथमिकतामा राख्दै विभिन्न कार्यक्रम सञ्चालन भइरहेको बताउनुभयो।
यस कार्यक्रमले स्वास्थ्यकर्मीहरूको क्षमता अभिवृद्धि हुनुका साथै समुदायस्तरमा NTD रोग नियन्त्रण तथा न्यूनीकरण अभियानलाई थप प्रभावकारी बनाउन महत्वपूर्ण टेवा पुग्ने अपेक्षा गरिएको छ।