झापामा कांग्रेसका ५ नेता कार्यकर्तामाथि कारबाही सिफारिस

झापा। नेपाली कांग्रेस झापाले पार्टीका ५ जना नेता–कार्यकर्तामाथि साधारण सदस्यसमेत नरहने गरी निष्कासनको कारबाही सिफारिस गरेको छ।
जिल्ला कार्यसमितिका सभापति देउकुमार थेवेको अध्यक्षतामा बसेको बैठकले दुई जना जिल्ला सदस्य र तीन जना क्षेत्रीय प्रतिनिधिलाई कारबाहीका लागि केन्द्रीय अनुशासन समितिमा सिफारिस गर्ने निर्णय गरेको हो।
पार्टीका जिल्ला सदस्य ठमनाथ नेपाल (झापा) र मुना भट्टराई (बुद्धशान्ति) तथा क्षेत्रीय प्रतिनिधि शम्भु खड्का (कनकाई), टेकनारायण संग्रौला (कनकाई) र दिपेन्द्र थापा (गौरीगञ्ज) लाई साधारण सदस्यसमेत नरहने गरी कारबाही सिफारिस गरिएको हो।
पार्टी सचिव कृष्ण हुमागाईंले जारी गरेको विज्ञप्तिअनुसार उनीहरूले केही समयदेखि पार्टी हितविपरीत गतिविधि गर्दै आएको र प्रतिनिधिसभा निर्वाचन–२०८२ मा पार्टीले उठाएका उम्मेदवारविरुद्ध गतिविधि गर्दै विपक्षी उम्मेदवारको पक्षमा प्रचार–प्रसार गरेको पाइएपछि कारबाही प्रक्रिया अघि बढाइएको जनाइएको छ।