एमालेले भन्यो- राजावादीले उद्दण्डता देखाए, पश्चगमनका दुष्प्रयासविरूद्ध गोलबन्द होऔं

झापा/ सत्तारुढ दल नेकपा एमालेले पश्चगमनका दुष्प्रयासविरूद्ध गोलबन्द हुन आह्वान गरेको छ। आइतबार बसेको पार्टीको सचिवालय बैठकले लोकतान्त्रिक गणतन्त्र र नेपालको संविधानको रक्षाका लागि दृढतापूर्वक उभिने संकल्प पनि गरेको छ। 
एमाले बैठकले सबै राजनीतिक दल, नागरिक समाज र आम नेपाली जनतालाई लोकतन्त्रका पक्षमा उभिन आह्वानसमेत गरेको छ। राजावादीका नाममा काठमाडौंको तीनकुने, कोटेश्वर र जडिबुटीलगायतका क्षेत्रमा अपराधिक समूहले देखाएको उद्दण्डता, अराजकता, तोडफोड, लुटपाट, हत्या र हिंसाका घटनालाई एमालेले निन्दा र भर्त्सना पनि गरेको छ। 
‘शान्तिपूर्ण प्रदर्शनका नाममा सवारी साधनको प्रयोग गरी सुरक्षा घेरा तोड्ने, सुरक्षाकर्मीमाथि आक्रमण गर्ने, हतियार खोस्ने, सर्वसाधारण नागरिकका घर, व्यवसायिक भवन, सञ्चार गृह, राजनीतिक दलका कार्यालय र सरकारी भवनमाथि आगजनी गर्ने, लुटपाट गर्ने, जानी जानी हिंसा र आतङ्क सिर्जना गर्ने तथा मुलुकको लोकतान्त्रिक प्रणालीलाई बिथोलेर अराजकतातिर धकेल्ने जस्ता अराजक र आपराधिक क्रियाकलापको छानबिन गरी दोषीउपर तत्काल कारबाहीको प्रक्रिया अघि बढाउन सरकारको ध्यानाकषर्ण गर्दछ,’ एमालेले विज्ञप्ति जारी गर्दै भनेको छ।
त्यस्तै एमालेले संसदमा भइरहेको अवरोधप्रति पनि ध्यानाकर्षण जनाएको छ। ‘प्रतिनिधिसभा र राष्ट्रियसभाको अवरोधका कारणले प्रतिस्थापन विधेयक पारित गर्ने प्रक्रियामा व्यवधान सिर्जना भइरहेको प्रति बैठकको ध्यानाकर्षण भएको छ। संविधान र कानुनको व्यवस्थाअनुरूपको कार्यसम्पादनमा उत्पन्न बाधा हटाउनका लागि प्रतिपक्षी दलहरूलाई अनुरोध गर्दछ। सरकारी विधेयकलाई संविधान र कानुनको व्यवस्थाअनुरूप सम्पादन गर्ने कर्तव्यतर्फ राष्ट्रियसभा अध्यक्ष र प्रतिनिधिसभाका सभामुखको ध्यानाकर्षण समेत गर्दछ,’ विज्ञप्तिमा भनिएको छ।