कोशी प्रदेश स्वास्थ्य मन्त्रालयमा ४१ करोड बढी बेरुजु

विराटनगर/कोशी प्रदेश सरकारको स्वास्थ्य मन्त्रालयमा मात्र ४१ करोड ३९ लाख १३ हजार रुपैयाँ बेरुजु देखिएको छ।

स्वास्थ्य मन्त्रालयको समेत जिम्मेवारी सम्हालेका पूर्वाधार विकासमन्त्री भूपेन्द्र राईले बिहीबार मन्त्रालयमा आयोजित पत्रकार भेटघाट कार्यक्रममा स्वास्थ्य मन्त्रालयमा कुल ४१ करोड ३९ लाख १३ हजार बेरुजु रहेको जानकारी दिएका हुन्।

भ्रष्टाचारमा शून्य सहनशीलता र सुशासन आफ्नो पहिलो संकल्प रहेको मन्त्री राईले बताए। “मन्त्रालयबाट हुने ढिलासुस्तीलाई निरुत्साहित गरी आमनागरिकले प्राप्त गर्ने सेवा विस्तार तथा निःशुल्क औषधि खरिद प्रक्रियालाई प्राथमिकता दिई काम भइरहेको छ, अब जनताले राहतको अनुभूति गर्नेछन्,” उनले भने।

मन्त्रालयमा आवश्यक जनशक्तिको अभावले कतिपय काम समयमा गर्न नसकेको स्पष्ट गदै मन्त्री राईले आर्थिक अभावका कारण कडा किसिमका रोग लागेका नागरिकलाई दिइने सुविधा प्रदान गर्न नसकिएको बताए।

“मन्त्रालयमा हाल जम्मा पाँच करोड रुपैयाँ मात्र बजेट छ, खर्च १४ करोड रुपैयाँको छ। यसको उचित व्यवस्थापन गर्दै नागरिकमैत्री सेवा प्रवाह गर्न संघीय सरकारसँग पहल गरिरहेका छौँ।”

कोशी प्रदेशमा हालसम्म स्वीकृत भएका अस्पताल २४, नवीकरण भएका १४, नयाँ सञ्चालनका लागि स्वीकृत भएका तीन, स्तरोन्नति भएका तीन, ‘एलओआई’ स्वीकृत भएका चार र अस्पतालका लागि निवेदन दर्ता भई स्वीकृत नभएका २३ रहेको जानकारी मन्त्री राईले जानकारी दिए। “प्रदेश स्वास्थ्य ऐनको मस्यौदा तयार भइसकेको छ। सैद्धान्तिक स्वीकृत पाएपछि सदनमा प्रवेश भई ऐन बनेपछि स्वास्थ्य क्षेत्रसँग सम्बन्धित समस्या सम्बोधन हुने विश्वास लिएको छु,” उनले भने।